മാഹിയിൽ ഇലക്ട്രിക് ബസ്, ഡയാലിസിസ് യൂണിറ്റ്, വീട്ടമ്മമാർക്ക് പ്രതിമാസം 2500 രൂപ

ജനപ്രിയ പ്രഖ്യാപനങ്ങളുമായി പുതുച്ചേരി ബജറ്റ്

മാഹി: അടുത്ത വർഷം നടക്കാനിരിക്കുന്ന പുതുച്ചേരി നിയമ സഭാ തിരഞ്ഞെടുപ്പ് മുന്നിൽ ക്കണ്ട് ജനപ്രിയ പ്രഖ്യാപനങ്ങളുമായി  പുതുച്ചേരി ബജറ്റ്  ധനവകുപ്പിൻ്റെ കൂടി ചുമതല വഹിക്കുന്ന മുഖ്യമന്ത്രി എൻ.രംഗ സാമി അവതരിപ്പിച്ചു. വീട്ടമ്മമാർക്ക് പ്രതിമാസം 2500 രൂപ സഹായം നൽകും. മാഹി ഗവ.ജനറൽ ആശുപത്രിയിൽ ഡയാലിസിസ് യൂനിറ്റ്, മാഹിയിൽ നിരത്തിൽ ഇലക്ടിക് ബസ് എന്നിങ്ങനെയാണ് ബജറ്റിൽ പ്രഖ്യാപനം.

     സർക്കാർ വിദ്യാലയങ്ങളിൽ പഠിച്ച കുട്ടികൾക്ക് ബിരുദ പഠന ക്കാലത്ത് മാസം തോറും ആയിരം രൂപ നൽകുമെന്നും ബജറ്റ് പ്രസംഗത്തിൽ മുഖ്യമന്ത്രി അറിയിച്ചു.അനാഥരായ വിദ്യാർഥികൾക്ക് മാസം തോറും 2000 രൂപ മതൽ 4000 വരെ സഹായം നൽകും. അനാഥരായ പട്ടിക ജാതി - പട്ടിക വർഗ വിദ്യാർഥികൾക്ക് 18 വയസ് തികയുന്നത് വരെ മാസം 5000 രൂപ വീതം സഹായം നൽകും. രക്ഷിതാക്കളെ നഷ്ടപ്പെട്ട ഒന്ന് മുതൽ അഞ്ചാം ക്ലാസ് വരെയുള്ള വിദ്യാർഥികൾക്ക് മാസം 2000 രൂപയും, ആറ് മുതൽ പത്ത് വരെയുള്ള വിദ്യാർഥികൾക് 3000 രൂപയും, പ്ലസ് വൺ, പ്ലസ് ടു വിദ്യാർഥികൾക്ക് 4000 രൂപയും ലഭിക്കും.

     ദാരിദ്ര്യരേഖയ്ക്ക് കീഴിലുള്ള കുടുംബങ്ങളിലെ വീട്ടമ്മമാർക്ക് പ്രതിമാസം 2500/- രൂപ നൽക്യം. എല്ലാ റേഷൻ കാർഡുടമകൾക്കും മാസം തോറും 10 കിലോ സൗജന്യ അരിക്കൊപ്പം രണ്ട് കിലോ ഗോതമ്പും സൗജന്യമായി ലഭിക്കും.എം എൽ എ മാരുടെ മണ്ഡല വികസന ഫണ്ട് രണ്ട് കോടിയിൽ നിന്ന് മൂന്ന് കോടിയായി ഉയർത്തും. മുൻ പ്രധാന മന്ത്രി എ.ബി.വാജ്പേയിയുടെ നാമധേയത്തിൽ പുതിയ ബസ് സ്റ്റാൻഡ് നിർമ്മിക്കും

    ആകെ 13,600 കോടി രൂപ ചെലവ് പ്രതീക്ഷിക്കുന്ന ബജറ്റാണ് മുഖ്യമന്ത്രി അവതരിപ്പിച്ചത്. ക്ഷേമ പദ്ധതികൾക്കായി 2 110 കോടി രൂപ വകയിരുത്തിയിട്ടുണ്ട്.ശമ്പളയിനത്തിൽ 2650 കോടിയും, പെൻഷന് 1566 കോടിയും, വൈദ്യുതി വാങ്ങുന്നതിന് 2546 കോടിയും ചെലവ് പ്രതീക്ഷിക്കുന്നു.

    അതേ സമയം അഭ്യസ്ത വിദ്യരായ യുവാക്കളുടെ തൊഴിലില്ലായ്മ പരിഹരിക്കുന്നതിനായി പുതുച്ചേരിയിൽ പുതിയ ഐടി പാർക്കുകൾ ആരംഭിക്കണമെന്ന് മാഹി എം എൽ എ രമേശ് പറമ്പത്ത് ആവശ്യപ്പെട്ടു. മാഹി സ്പിന്നിങ്ങ് മിൽ ഉൾപ്പെടെ സംസ്ഥാനത്ത് കോവിഡ് കാലത്ത് അടച്ചു പൂട്ടിയ മില്ലുകൾ തുറന്ന് പ്രവർത്തിപ്പിക്കണം - ഒരു പരിധി വരെ ആശ്വാസകരമായ ബജറ്റാണ് മുഖ്യമന്ത്രി അവതരിപ്പിച്ചതെന്ന് രമേശ് പറമ്പത്ത് പറഞ്ഞു.