ലോറി കടന്നു പോയതിന് പിന്നലെ നടുറോഡിൽ വമ്പൻ കിണർ‌ പ്രത്യക്ഷപ്പെട്ടു! അമ്പരന്ന് ജനങ്ങൾ '

കോട്ടയത്തെ റോഡിൽ‌ കിണർ രൂപപ്പെട്ടു. കോട്ടയം മണർകാട് പള്ളിക്ക് സമീപമാണ് സംഭവം. ലോറി കയറി കുഴി രൂപപ്പെട്ടതിന് പിന്നാലെയാണ് കിണർ പ്രത്യക്ഷപ്പെട്ടത്.

റോഡിലൂടെ കടന്നുപോയ ലോറിയുടെ ഒരു ഭാ​ഗം പെട്ടെന്ന് റോഡിലേക്ക് താഴ്ന്നു. മണ്ണും കല്ലുമായി പോയതായിരുന്ന ലോറിയാണ് വശത്തേക്ക് ചരിഞ്ഞത്. തുടർന്ന് ജെസിബിയെത്തിച്ച് ലോഡ് നീക്കം ചെയ്തശേഷം ലോറി മാറ്റിയതോടെയാണ് റോഡില്‌ ഒരു വശത്ത് വൻ കുഴി പ്രത്യക്ഷപ്പെട്ടത്. പിന്നാലെ ഈ ഭാ​ഗത്തെ മണ്ണും കല്ലും അടർന്ന് താഴേക്ക് പതിച്ചു. ഇതോടെ നടുറോഡിൽ കിണർ പ്രത്യക്ഷപ്പെട്ടു. ഇതോടെ ഗതാഗതം തടസപ്പെട്ടു. കിണർ മണ്ണിട്ടു മൂടിയ ശേഷം ടാർ ചെയ്യുമെന്ന് അധികൃതർ അറിയിച്ചിട്ടുണ്ട്.

വർഷങ്ങളുടെ പഴക്കമുള്ള കിണറാണിതെന്നാണ് നി​ഗമനം. നേരത്തെ ചെറിയ റോഡായിരുന്നു ഇവിടെയുണ്ടായിരുന്നത്. ഒരു ചായക്കടയും കിണറും ഇവിടെ ഉണ്ടായിരുന്നതായി പഴമക്കാർ പറയുന്നു. റോഡിന് വീതി കൂട്ടുന്നതിന്റെ ഭാഗമായി സ്ഥലം ഏറ്റെടുത്തപ്പോൾ മണ്ണിട്ടു കുഴി മൂടുന്നതിന് പകരം കരിങ്കൽപാളി ഉപയോഗിച്ച് കിണർ മൂടുകയായിരുന്നു