*കരുവയൽ അങ്കണവാടിയിൽ ‘ആംഗൻ കാ ഉത്സവ്’*
അഴിയൂർ: സേവാ സങ്കൽപ് അഭിയാന്റെ ഭാഗമായി അഴിയൂർ ഗ്രാമപഞ്ചായത്ത് വാർഡ് 4 മാഹി റെയിൽവേ സ്റ്റേഷനിലെ കരുവയൽ അങ്കണവാടിയിൽ ‘ആംഗൻ കാ ഉത്സവ്’ സംഘടിപ്പിച്ചു.
അങ്കണവാടിയുടെ പ്രവർത്തനങ്ങളെയും കുട്ടികളുടെയും അമ്മമാരുടെയും ക്ഷേമത്തെയും മുൻനിർത്തി വിവിധ സേവന പ്രവർത്തകരെ ആദരിച്ചുകൊണ്ടാണ് പരിപാടി സംഘടിപ്പിച്ചത്.
വാർഡ് മെമ്പർ ശ്രീമതി തോട്ടത്തിൽ മഹിജയുടെ നേതൃത്വത്തിൽ നടന്ന പരിപാടിയിൽ വാർഡ് കൺവീനർ ശശിധരൻ തോട്ടത്തിൽ, വാർഡ് സേവാ പ്രവർത്തകർ, അങ്കണവാടി പ്രവർത്തകർ, പരിസരവാസികൾ തുടങ്ങിയവർ പങ്കെടുത്തു.
ചടങ്ങിൽ അങ്കണവാടി വർക്കർ, ഹെൽപ്പർ, ആശാ വർക്കർ, പ്രധാനമന്ത്രി മാതൃ വന്ദന യോജനയുടെ ആനുകൂല്യം ലഭിച്ച അമ്മമാർ എന്നിവരെ ആദരിച്ചു. അങ്കണവാടിയുടെ പ്രവർത്തനങ്ങൾക്ക് വർഷങ്ങളോളം സേവനം നൽകിയ മുൻ അങ്കണവാടി വർക്കറെയും ഹെൽപ്പറെയും ചടങ്ങിൽ പ്രത്യേകം ആദരിച്ചു.
കോവിഡ് മഹാമാരിയുടെ കാലഘട്ടത്തിൽ വാർഡിൽ സജീവമായി സേവനം നടത്തിയ ആശാ വർക്കർ രജനിയെയും ചടങ്ങിൽ പ്രത്യേകമായി ആദരിച്ചു.
പ്രതിസന്ധി ഘട്ടത്തിൽ ആരോഗ്യ പ്രവർത്തകർ നടത്തിയ സേവനങ്ങളെ അനുസ്മരിക്കുന്നതിന്റെ ഭാഗമായാണ് ആദരം നൽകിയത്.
വാർഡ് മെമ്പർ തോട്ടത്തിൽ മഹിജ അങ്കണവാടിയിലെ കുരുന്നുകൾക്ക് പഴങ്ങളും മധുരപലഹാരങ്ങളും വിതരണം ചെയ്തും കുട്ടികളോടൊപ്പം സമയം ചെലവഴിച്ചും പരിപാടി ആഘോഷപൂർവമായി നടത്തി.
കുട്ടികളുടെ സന്തോഷവും പങ്കാളിത്തവും പരിപാടിക്ക് കൂടുതൽ മികവേകി.
അങ്കണവാടിയുമായി ബന്ധപ്പെട്ട് പ്രവർത്തിക്കുന്നവരെയും സേവന രംഗത്ത് സജീവമായി ഇടപെടുന്നവരെയും ആദരിക്കുകയും കുട്ടികൾക്ക് സന്തോഷകരമായ അനുഭവം ഒരുക്കുകയും ചെയ്ത പരിപാടി ശ്രദ്ധേയമായി.
പരിപാടിയുടെ വിജയത്തിനായി സഹകരിച്ച വാർഡ് സേവാ പ്രവർത്തകർ, അങ്കണവാടി പ്രവർത്തകർ, പരിസരവാസികൾ എന്നിവർക്കും നന്ദി അറിയിച്ചു.
Post a Comment