*ജനക്ഷേമവും വികസനവും കൈകോർത്ത ബജറ്റ്; മാഹിക്ക് വൻ പദ്ധതികൾ — വഖഫ് ബോർഡ്* *ചെയർമാൻ അഭിനന്ദിച്ചു*

2026–27 സാമ്പത്തിക വർഷത്തേക്കായി ജനക്ഷേമത്തിനും സമഗ്ര വികസനത്തിനും ഒരുപോലെ ഊന്നൽ നൽകി ബജറ്റ് അവതരിപ്പിച്ച മുഖ്യമന്ത്രി ശ്രീ എൻ. രംഗസാമിക്ക് പുതുച്ചേരി സംസ്ഥാന വഖഫ് ബോർഡ് ചെയർമാൻ വി. പി. അബ്ദുൽ റഹ്മാൻ ഹൃദയപൂർവ്വം അഭിനന്ദനങ്ങൾ അറിയിച്ചു.

വിദ്യാഭ്യാസം, ആരോഗ്യം, ഭക്ഷ്യസുരക്ഷ, വനിതാ ക്ഷേമം, സാമൂഹ്യനീതി തുടങ്ങിയ മേഖലകൾക്ക് മുൻഗണന നൽകുന്ന ബജറ്റിലെ വിദ്യാർത്ഥികൾക്ക് സൗജന്യ ബസ് യാത്രയും ടാബ്ലറ്റും, റേഷൻ സംവിധാനത്തിന്റെ ശക്തീകരണം, വയോജനങ്ങൾക്കും ഭിന്നശേഷിക്കാർക്കും മൊബൈൽ മെഡിക്കൽ സേവനം തുടങ്ങിയ പ്രഖ്യാപനങ്ങൾ ഏറെ സ്വാഗതാർഹമാണെന്ന് അദ്ദേഹം പറഞ്ഞു.

 മാഹിക്ക് വികസനത്തിന്റെ പുതിയ കുതിപ്പ്

മാഹിക്കായി ബജറ്റിൽ ഉൾപ്പെടുത്തിയ പുതിയ ഡയാലിസിസ് യൂണിറ്റ്, ട്രോമ കെയർ യൂണിറ്റ്, പള്ളൂർ സി.എച്ച്.സി.യുടെ ₹8 കോടി വികസനം, AYUSH ടെലിമെഡിസിൻ സെന്റർ, അഞ്ച് ഇലക്ട്രിക് ബസുകൾ, റോഡ് നവീകരണം, റിവർസൈഡ് വാക്ക്‌വേ രണ്ടാംഘട്ട വികസനം എന്നിവ മാഹിയുടെ ആരോഗ്യ, ഗതാഗത, അടിസ്ഥാന സൗകര്യ മേഖലകളിൽ വലിയ മുന്നേറ്റത്തിന് വഴിയൊരുക്കുമെന്ന് അദ്ദേഹം വ്യക്തമാക്കി.

 ജനങ്ങളുടെ ക്ഷേമവും പുതുച്ചേരിയുടെ സമഗ്ര വികസനവും ലക്ഷ്യമിടുന്ന ഈ ദീർഘവീക്ഷണമുള്ള ബജറ്റ് പുതുച്ചേരിയുടെ പുരോഗതിക്ക് പുതിയ അധ്യായം തുറക്കുമെന്ന് പ്രതീക്ഷിക്കുന്നതായും അദ്ദേഹം പറഞ്ഞു.