സി.ബി.എസ്.ഇ. സിലബസ് : കുട്ടികളുടെ പ്രയാസം പരിഹരിക്കണം - പേരൻ്റ്സ് അസോസിയേഷൻ

മയ്യഴി: സി.ബി.എസ്.ഇ സിലബസ് വന്നതോടു കൂടി കുട്ടികൾ അനുഭവിക്കുന്ന പ്രയാസങ്ങൾ പരിഹരിക്കാൻ അടിയന്തര നടപടികൾ സ്വീകരിക്കണമെന്ന്

മാഹി മേഖല ഗവ. സ്കൂൾ പേരൻ്റ്സ് അസോസിയേഷൻ ഭാരവാഹികൾ പത്ര സമ്മേളനത്തിൽ അറിയിച്ചു.

സി.ബി.എസ്.സി. സിലബസ് ഇനിയും ഉൾക്കൊള്ളാൻ കഴിയാത്തവരും പഠിപ്പിക്കാൻ പ്രാപ്തരല്ലാത്തവരുമായ പകുതിയോളം അധ്യാപകർ വിദ്യാർഴികൾക്ക് ബാധ്യതയായി മാറുകയാണെന്ന് അസോസിയേഷൻ ആരോപിച്ചു.

 ഈ നിലവാരത്തകർച്ച കണക്കിലെടുത്ത് 10, 11, 12 ക്ളാസുകളിലെ ബോർഡ് പരീക്ഷകളിൽ വിദ്യാർഴികൾക്ക്‌ 25 ശതമാനം പ്രമോഷൻ മാർക്ക് അനുവദിക്കണമെന്നും ആവശ്യപ്പെട്ടു. അധ്യാപകരുടെ നിലവാരം വർധിപ്പിച്ചില്ലെങ്കിൽ മയ്യഴി വിദ്യാഭ്യാസ മേഖല പൂർണ്ണമായും തകരുന്ന സാഹചര്യമാണുണ്ടാവുകയെന്നും അധികൃതർ ഭീകരമായ അവസ്ഥ മനസിലാക്കി ആവശ്യമായ പരിഹാര നടപടികൾ സ്വീകരിക്കണമെന്നും ആവശ്യപ്പെട്ടു.

  

മാഹി ഗവ. എൽ.പി സ്കൂൾ അടച്ചു പൂട്ടി അവിടെ നഴ്സിങ് കോളേജ് ആരംഭിക്കുന്ന നടപടി പിൻവലിക്കണമെന്ന് ആവശ്യപ്പെട്ടു. പള്ളൂർ കസ്തൂർബാ ഗാന്ധി ഹൈസ്കൂളിലെ പഴയ ജവഹർ മിനി ബാലഭവൻ കെട്ടിടത്തിന് 13 ക്ലാസ് മുറികൾ നഴ്സിങ്ങ് കോളേജിന് ഉപയോഗപ്പെടുത്തണമെന്ന് ആവശ്യപ്പെട്ടു.

ബാലകലാമേള അസമയത്ത് നടത്തുന്നത് ഉചിതമല്ല. അധ്യയന വർഷം തുടങ്ങിയ ശേഷം അനവസരങ്ങളിൽ അധ്യാപകരെ സ്ഥലം മാറ്റുന്നത് ഒഴിവാക്കണം. സ്കൂ‌ൾ യൂണിഫോമിൽ സമഗ്രമായ മാറ്റം വരുത്തണം. യു.പി. മുതലുള്ള പെൺകുട്ടികൾക്ക് ഓവർ കോട്ട് നൽകണം. സ്റ്റുഡൻ്റ്സ് ഐ.ഡി. കാർഡ് സംവിധാനം നിർബ്ബന്ധയും ഏർപ്പെടുത്തണം.

പിഎം ശ്രീ ആയി ഉയർത്തപ്പെട്ട പ്രത്യേക പരിഗണയിലുള്ള ചാലക്കര ഉസ്മാൻ ഗവ. ഹൈസ്ക്കൂളിന് ആവശ്യമായ കളിസ്ഥലം ഉറപ്പു വരുത്താൻ നടപടി സ്വീകരിക്കണം. എസ്.എം.സിയും എസ്.എം.ഡി.സിയും പല സ്കൂളുകളിലും വേണ്ട രീതിയിൽ പ്രവർത്തിക്കുന്നില്ല. ഇവയുടെ പ്രവർത്തനം കാര്യക്ഷമമാക്കണം. ഫ്രഞ്ച് സ്കൂളിൽ ഫ്രഞ്ച് ഭാഷയിൽ പ്രാവീണ്യമുള്ള അധ്യാപകരെ നിയമിക്കണം. ഫ്രഞ്ച്, അറബിക്ക് പോലുള്ള വിഷയങ്ങളിലേക്കുള്ള അധ്യാപക നിയമനത്തിന് ആവശ്യമായ ഭേദഗതികൾ വരുത്തുക തുടങ്ങിയ അവശ്യങ്ങളും ഉന്നയിച്ച് ലഫ്. ഗവർണർ ഉൾപ്പടെയുള്ള അധികാരികൾക്ക് നിവേദനം നൽകിയതായി ഭാരവാഹികൾ അറിയിച്ചു. പത്ര സമ്മേളനത്തിൽ

ഷോഘിത വിനീത്, റഷീദ് അടുവാട്ടിൽ, ഷിബു കാളാണ്ടിയിൽ, ധനൂപ, ഫെബിന കലീൽ എന്നിവർ പങ്കെടുത്തു.