പണവും മൊബൈൽ ഫോണും കവർന്ന് രക്ഷപ്പെടാൻ ശ്രമിച്ച രണ്ടംഗ സംഘത്തിലെ യുവാവ് ട്രെയിൻ തട്ടി മരിച്ചു; ഒപ്പം ഉണ്ടായിരുന്നയാൾ പിടിയിൽ

ന്യൂ മാഹി: ശനിയാഴ്‌ച വൈകീട്ട് ന്യൂ മാഹി സ്വദേശി

മുസ്‌തഫയെ തടഞ്ഞു നിർത്തി പണവും മൊബൈൽ ഫോണും കവർന്ന് രക്ഷപ്പെടാൻ ശ്രമിച്ച രണ്ടംഗ സംഘത്തിലെ ഒരാൾ ട്രെയിൻ തട്ടി മരിച്ചു.

ഇയാളുടെ ഒപ്പം ഉണ്ടായിരുന്ന കണ്ണൂർ സ്വദേശി ബഷീർ പിടിയിലായി. ബഷീറിനെ നാട്ടുകാർ പിടികൂടി പൊലീസിൽ ഏൽപ്പിക്കുകയായിരുന്നു. ന്യൂമാഹി പെരിങ്ങാടി മമ്മി മുക്കിൽ വച്ചായിരുന്നു സംഭവം.

ആറ്റക്കൂലോത്ത് മുസ്‌തഫയെ തടഞ്ഞു നിർത്തി പണവും, മൊബൈൽ ഫോണും കവർന്ന് രണ്ടംഗ സംഘം രക്ഷപ്പെടുകയായിരുന്നു. മുസ്‌തഫ വിവരമറിയിച്ചതിനെ തുടർന്ന് നാട്ടുകാർ പ്രതികൾക്കായി തിരച്ചിൽ നടത്തി വരവെയാണ് പെരിങ്ങാടി റെയിൽവെ ഗേറ്റിന് സമീപം ഒരാളെ ട്രെയിൻ തട്ടി മരിച്ച നിലയിൽ കണ്ടെത്തുന്നത്.

മരിച്ചയാളെ തിരിച്ചറിഞ്ഞിട്ടില്ലെന്ന് ന്യൂ മാഹി പൊലീസ് പറഞ്ഞു. സംഭവത്തിൽ കൂടുതൽ അന്വേഷണം നടക്കുകയാണ്.