ചർച്ച പരാജയം:  പിആർടിസി ജീവനക്കാരുടെ പണിമുടക്ക് തുടരും

പുതുച്ചേരി സ്റ്റേറ്റ് റോഡ് ട്രാൻസ്പോർട്ട് കോർപ്പറേഷനിൽ 15 വർഷത്തിലേറെയായി ജോലി ചെയ്യുന്ന കരാർ ഡ്രൈവർമാരും കണ്ടക്ടർമാരും സ്ഥിരം തൊഴിൽ ആവശ്യപ്പെട്ട് നടത്തുന്ന പ്രതിഷേധത്തിന് പരിഹാരം കാണുവാൻ ജീവനക്കാരും മുഖ്യമന്ത്രി എൻ. രംഗസാമിയും തമ്മിൽ ചൊവ്വാഴ്ച നടന്ന ചർച്ച പരാജയപ്പെട്ടു. ഇതിനെത്തുടർന്ന് പണിമുടക്ക് തുടരാൻ ജീവനക്കാർ തീരുമാനിച്ചു.

ഇതേത്തുടർന്ന് പുതുച്ചേരി റോഡ് ട്രാൻസ്പോർട്ട് കോർപ്പറേഷൻ ബസുകളിൽ യാത്രയ്ക്ക് ബുക്ക് ചെയ്തിരുന്ന യാത്രക്കാരുടെ ടിക്കറ്റുകൾ റദ്ദാക്കി. താൽക്കാലിക ജീവനക്കാരെ പിന്തുണച്ച് ഓഫീസ് ജീവനക്കാരും ചൊവ്വാഴ്‌ച മുതൽ പണിമുടക്കി.

നിലവിൽ 50 ബസുകൾ മാത്രമേ സർവീസ് നടത്തുന്നുള്ളൂ, 40 സ്ഥിരം ജീവനക്കാരും 130 കരാർ ജീവനക്കാരും ഇതിൽ ഉൾപ്പെടുന്നു.

പിആർടിസി മാനേജ്മെൻ്റ് വാഗ്ദാനം നിറവേറ്റാൻ ഒരു നടപടിയും സ്വീകരിക്കാത്തതിനാൽ തിങ്കളാഴ്ച മുതൽ പണിമുടക്ക് തുടരുകയാണ്. പുതുച്ചേരി, കാരയ്ക്കൽ, മാഹി,യാനം എന്നീ 4 മേഖലകളിലും തൊഴിലാളികളുടെ പ്രതിഷേധം നടക്കുന്നു.

ഇതുമൂലം ചെന്നൈ, കാരയ്ക്കൽ, മാഹി, തിരുവണ്ണാമലൈ, കടലൂർ, വില്ലുപുരം ഭാഗങ്ങളിലേക്ക് പിആർടിസി ബസുകൾ സർവീസ് നടത്തുന്നില്ല.