പതിമൂന്നാം വാർഡിലെ റോഡ് ദുരിതം: പഞ്ചായത്ത് ഭരണസമിതിക്കും വാർഡ് മെമ്പർക്കുമെതിരെ ജനങ്ങളെ അണിനിരത്തി പ്രതിഷേധം സംഘടിപ്പിക്കും – മുസ്ലിം ലീഗ് ഉസ്സൻമൊട്ട ശാഖ കമ്മിറ്റി

ന്യൂ മാഹി: ന്യൂ മാഹി പഞ്ചായത്ത് പതിമൂന്നാം വാർഡിലെ റോഡിന്റെ ശോചനീയാവസ്ഥയിൽ പ്രതിഷേധിച്ച് ജനങ്ങളെ അണിനിരത്തി ശക്തമായ പ്രക്ഷോഭ പരിപാടികൾ സംഘടിപ്പിക്കുമെന്ന് മുസ്ലിം ലീഗ് ഉസ്സൻമൊട്ട ശാഖ കമ്മിറ്റി അറിയിച്ചു.

റോഡ് തകർന്നും കുഴികൾ രൂപപ്പെട്ടും യാത്രാദുരിതം രൂക്ഷമായിട്ടും പ്രശ്നത്തിന് പരിഹാരം കാണാൻ പഞ്ചായത്ത് ഭരണസമിതിയും വാർഡ് മെമ്പറും തയ്യാറാകാത്തത് കടുത്ത ജനരോഷത്തിന് ഇടയാക്കിയിരിക്കുകയാണ്. തിരഞ്ഞെടുപ്പിൽ വിജയിച്ച് അധികാരത്തിലെത്തിയ ശേഷം വാർഡിലെ ജനങ്ങളുടെ അടിസ്ഥാന പ്രശ്നങ്ങൾ അന്വേഷിക്കാനോ പരിഹാരത്തിനായി ഫലപ്രദമായ ഇടപെടൽ നടത്താനോ വാർഡ് മെമ്പർ തയ്യാറാകുന്നില്ലെന്ന ആരോപണവും ശക്തമാണ്.

റോഡിന്റെ തകർച്ച കാരണം വാഹനങ്ങൾക്ക് ഇതുവഴി കടന്നുപോകാൻ കഴിയാത്ത സാഹചര്യമാണുള്ളത്. രോഗികളെ ആശുപത്രിയിലെത്തിക്കാനും കുട്ടികൾക്ക് സ്കൂളിലേക്ക് പോകാനും വാഹനസൗകര്യം ലഭിക്കാത്തത് പ്രദേശവാസികളുടെ ദൈനംദിന ജീവിതത്തെ സാരമായി ബാധിക്കുന്നു. അടിയന്തര ഘട്ടങ്ങളിൽ പോലും വാഹനങ്ങൾ എത്തിക്കാൻ കഴിയാത്ത അവസ്ഥയുണ്ടായിട്ടും പഞ്ചായത്ത് അധികൃതർ പുലർത്തുന്ന നിസ്സംഗത പ്രതിഷേധാർഹമാണ്.

ജനങ്ങളുടെ വോട്ട് നേടി അധികാരത്തിലെത്തിയ ജനപ്രതിനിധികൾക്ക് ജനങ്ങളോടുള്ള ഉത്തരവാദിത്തം മറക്കാനാവില്ല. വാർഡിലെ അടിസ്ഥാന സൗകര്യങ്ങൾ ഉറപ്പാക്കേണ്ട പഞ്ചായത്ത് ഭരണസമിതി ഇക്കാര്യത്തിൽ മറുപടി പറയണം. റോഡിന്റെ ശോചനീയാവസ്ഥ പരിഹരിക്കാൻ ഇതുവരെ സ്വീകരിച്ച നടപടികൾ എന്താണെന്നും, ജനങ്ങളുടെ യാത്രാദുരിതത്തിന് പരിഹാരം കാണാൻ എത്രകാലം കാത്തിരിക്കണമെന്നുമുള്ള ചോദ്യങ്ങൾക്ക് അധികൃതർ മറുപടി നൽകണം.

വാഗ്ദാനങ്ങൾക്കും ഉറപ്പുകൾക്കും പകരം അടിയന്തരമായി റോഡ് ഗതാഗതയോഗ്യമാക്കാനുള്ള നടപടികളാണ് വേണ്ടത്. പഞ്ചായത്ത് ഭരണസമിതിയുടെയും വാർഡ് മെമ്പറുടെയും ഉത്തരവാദിത്തമില്ലാത്ത സമീപനം ഇനിയും അംഗീകരിക്കാനാവില്ല.

ജനങ്ങളുടെ ന്യായമായ ആവശ്യങ്ങൾ അവഗണിക്കുന്ന സമീപനം തുടർന്നാൽ പ്രദേശവാസികളെ അണിനിരത്തി ശക്തമായ ജനകീയ പ്രതിഷേധം സംഘടിപ്പിക്കും. റോഡ് പുനർനിർമാണത്തിന് അടിയന്തര നടപടി സ്വീകരിക്കുന്നതുവരെ ജനകീയ പ്രക്ഷോഭവുമായി മുന്നോട്ടുപോകുമെന്നും മുസ്ലിം ലീഗ് ഉസ്സൻമൊട്ട ശാഖ കമ്മിറ്റി പ്രസ്താവനയിൽ അറിയിച്ചു.