*ജനാധിപത്യം ശക്തിപ്പെടുത്താൻ കൈകോർക്കാം; മാഹിയിൽ ഓൺലൈൻ വോട്ടർ പ്രതിജ്ഞയ്ക്ക് തുടക്കമായി*

​മാഹി: 2026-ലെ നിയമസഭാ തിരഞ്ഞെടുപ്പിനോടനുബന്ധിച്ച് വോട്ടർമാരെ ബോധവൽക്കരിക്കുന്നതിനും പോളിംഗ് ശതമാനം വർദ്ധിപ്പിക്കുന്നതിനുമായി മാഹിയിൽ ‘ഓൺലൈൻ പ്ലെഡ്ജ്’ (Online Pledge) ക്യാമ്പയിൻ ആരംഭിച്ചു. മാഹി റിട്ടേണിംഗ് ഓഫീസർ (RO) അങ്കിത് കുമാർ ഐ.എ.എസ്. പദ്ധതിയുടെ ഉദ്ഘാടനം നിർവ്വഹിച്ചു. സ്വീപ്പിന്റെ (SVEEP - Systematic Voters' Education and Electoral Participation) ആഭിമുഖ്യത്തിലാണ് ഈ വേറിട്ട പരിപാടി സംഘടിപ്പിക്കുന്നത്.

​തിരഞ്ഞെടുപ്പ് പ്രക്രിയയിൽ ഓരോ പൗരന്റെയും പങ്കാളിത്തം ഉറപ്പുവരുത്തുക എന്ന ലക്ഷ്യത്തോടെയാണ് ഈ ഓൺലൈൻ ക്യാമ്പയിൻ വിഭാവനം ചെയ്തിരിക്കുന്നത്. വോട്ടർമാർക്ക് ഇതിനായി പ്രത്യേകം തയ്യാറാക്കിയ ലിങ്കിൽ ക്ലിക്ക് ചെയ്ത് തങ്ങളുടെ പേരും ഇമെയിൽ വിലാസവും നൽകി ജനാധിപത്യ പ്രക്രിയയിൽ പങ്കാളികളാകുമെന്ന് പ്രതിജ്ഞ എടുക്കാവുന്നതാണ്. പ്രതിജ്ഞ വിജയകരമായി പൂർത്തിയാക്കുന്നവർക്ക് റിട്ടേണിംഗ് ഓഫീസർ ഒപ്പിട്ട ഇ-സർട്ടിഫിക്കറ്റ് അപ്പോൾ തന്നെ ഡൗൺലോഡ് ചെയ്യാനുള്ള സൗകര്യവും ഒരുക്കിയിട്ടുണ്ട്.

​

ജനാധിപത്യത്തെ ശക്തിപ്പെടുത്തുന്നതിനും ഉത്തരവാദിത്തമുള്ള വോട്ടർമാരായി മാറുന്നതിനും എല്ലാ വിഭാഗം ജനങ്ങളും, പ്രത്യേകിച്ച് യുവാക്കൾ ഈ ക്യാമ്പയിനിൽ പങ്കുചേരണമെന്ന് റിട്ടേണിംഗ് ഓഫീസർ അഭ്യർത്ഥിച്ചു. മാഹിയിലെ വോട്ടിംഗ് ശതമാനം ഉയർത്തുന്നതിനായി വിവിധങ്ങളായ ബോധവൽക്കരണ പരിപാടികളാണ് സ്വീപ്പിന്റെ നേതൃത്വത്തിൽ നടന്നുവരുന്നത്.

​

ഓൺലൈൻ പ്രതിജ്ഞ എടുക്കുന്നതിനായി താഴെ പറയുന്ന ലിങ്ക് സന്ദർശിക്കുക:

https://forms.gle/AU6SP9QCkpVAN6fN9

​