ബിജെപി മാഹി മണ്ഡലം കമ്മിറ്റി പന്തക്കൽ ജംഗ്ഷൻ റോഡ് ഉപരോധിച്ചു

 *കോൺഗ്രസ് എംഎൽഎ യുടെ പിന്തുണയോടെ ഉദ്യോഗസ്ഥരും കരാറുകാരും നടത്തുന്ന അഴിമതിയും അശാസ്ത്രീയ റോഡ് നിർമാണവും ചോദ്യം ചെയ്ത്

ബിജെപി മാഹി മണ്ഡലം കമ്മിറ്റി പന്തക്കൽ ജംഗ്ഷൻ ഉപരോധിച്ചു* 

 വർഷങ്ങളായി കോൺഗ്രസ് ഭരണകാലത്ത് നടക്കാതിരുന്ന മയ്യഴിയിലെ റോഡ് വികസനം, NDA ഭരണകാലത്ത് നടക്കുന്നത് കണ്ട് അസൂയ പൂണ്ട കോൺഗ്രസ്സിൻ്റെയും സ്ഥലം എംഎൽഎയുടെയും രാഷ്ട്രീയലാക്കോടെ പ്രവർത്തിക്കുന്ന ചില ഉദ്യോഗസ്ഥരുടെയും വികസനവിരുദ്ധ നയങ്ങളും അഴിമതിയും ജനദ്രോഹവും ചോദ്യം ചെയ്ത് ഭാരതീയ ജനതാ പാർട്ടി മാഹി മണ്ഡലം കമ്മിറ്റിയുടെ നേതൃത്വത്തിൽ പന്തക്കൽ ജംഗ്ഷനിൽ ശക്തമായ റോഡ് ഉപരോധവും പ്രതിഷേധ പ്രകടനവും നടത്തി.

പത്ത് വർഷത്തിലേറെയായി മാഹി മേഖലയിൽ ടാറിങ് പോലും നടത്താൻ കഴിയാതെ ജനങ്ങളെ ദുരിതത്തിലാക്കിയ കോൺഗ്രസ്, ഇന്ന് എല്ലാ വികസനവും തങ്ങളാണ് നടത്തിയതെന്നു അവകാശപ്പെടുന്നത് ജനങ്ങളെ വെല്ലുവിളിക്കുന്ന തുറന്ന കള്ളപ്രചാരണമാണെന്ന് ബിജെപി ആരോപിച്ചു. പോണ്ടിച്ചേരിയിൽ എൻഡിഎ സർക്കാർ അധികാരത്തിൽ വന്നതോടെയാണ് മാഹിയിലെ റോഡുകളുടെ ദയനീയ അവസ്ഥയ്ക്ക് പരിഹാരം കാണുന്നതിനായി കേന്ദ്ര നബാർഡ് ഫണ്ടിൽ നിന്നുൾപ്പെടെ വൻതോതിൽ ധനസഹായം അനുവദിച്ചതെന്നും, പോണ്ടിച്ചേരിയിലെ ബിജെപി നോമിനേറ്റ് എംഎൽഎമാരുടെ ഇടപെടലിലൂടെ മാഹി പി.ഡബ്ല്യു.ഡി. വകുപ്പിനും മുനിസിപ്പാലിറ്റിക്കും നിരവധി വികസന ഫണ്ടുകൾ ലഭ്യമാക്കിയതായും നേതാക്കൾ വ്യക്തമാക്കി.

എന്നാൽ ഈ വികസന പ്രവർത്തനങ്ങൾ തങ്ങളുടെ രാഷ്ട്രീയ നിലനില്പിന് ഭീഷണിയാകുമെന്ന് തിരിച്ചറിഞ്ഞ മാഹിയിലെ കോൺഗ്രസ് എംഎൽഎയും ചില അഴിമതി ബാധിച്ച കോൺട്രാക്ടർമാരും ഉദ്യോഗസ്ഥരുമൊത്ത് ചേർന്ന് റോഡ് നിർമാണങ്ങൾ ബോധപൂർവ്വം അട്ടിമറിക്കുകയാണെന്ന് പ്രതിഷേധക്കാർ കുറ്റപ്പെടുത്തി. നിലവാരമില്ലാത്ത ടാറിങ് നടത്തി പൊതുമുതൽ കൊള്ളയടിക്കുന്നതിന്റെ ഫലമായി ടാറിങ് ചെയ്ത് ആറുമാസം പോലും കഴിയാത്ത റോഡുകൾ പൂർണ്ണമായും തകർന്ന നിലയിലാണ്.

ജനങ്ങളുടെ പ്രശ്നങ്ങൾ ചോദ്യം ചെയ്യുമ്പോൾ, ഉത്തരവാദിത്വം ഏറ്റെടുക്കാൻ തയ്യാറാകാതെ ഒളിച്ചോടുന്ന നിലപാടാണ് മാഹി എംഎൽഎ സ്വീകരിക്കുന്നതെന്ന് ബിജെപി ആരോപിച്ചു. റോഡുകളുടെ ദയനീയ അവസ്ഥയെക്കുറിച്ച്  പലതവണ ഉദ്യോഗസ്ഥരുടെ ശ്രദ്ധയിൽ കൊണ്ടുവന്നിട്ടും യാതൊരു നടപടിയും സ്വീകരിക്കാത്തത് കോൺഗ്രസ്–ഉദ്യോഗസ്ഥ–കോൺട്രാക്ടർ കൂട്ടുകെട്ടിന്റെ വ്യക്തമായ തെളിവാണെന്നും നേതാക്കൾ പറഞ്ഞു.

പുതുതായി ടാറിങ് ചെയ്ത റോഡുകൾ ആഴ്ചകൾക്കുള്ളിൽ തകർന്നതോടെ ദുരിതത്തിലായ നാട്ടുകാർ പരിഹാരം ആവശ്യപ്പെട്ട് സ്ഥലം എംഎൽഎയെ സമീപിച്ചെങ്കിലും, എംഎൽഎ ജനങ്ങളുടെ പരാതികൾക്ക് ചെവി കൊടുക്കാതെ ബന്ധപ്പെട്ട കരാറുകാരനുമായി ഒത്തുചേർന്ന് പ്രശ്നം മൂടിവയ്ക്കാനാണ് ശ്രമിച്ചതെന്ന് ബിജെപി കുറ്റപ്പെടുത്തി. ജനങ്ങളുടെ സുരക്ഷയും സൗകര്യങ്ങളും അവഗണിച്ച്, അഴിമതി സംരക്ഷിക്കുകയാണ് എംഎൽഎയുടെ ഏക ലക്ഷ്യമെന്നതും നേതാക്കൾ ആരോപിച്ചു.

 ബിജെപി മാഹി മണ്ഡലം കമ്മിറ്റിയുടെ ശക്തമായ ഇടപെടലിനെ തുടർന്ന് മാത്രമാണ് റീടാറിങ് നടത്തുന്നതിനുള്ള അനുമതി ബന്ധപ്പെട്ട വകുപ്പുകളിൽ നിന്നും ഉറപ്പാക്കാൻ കഴിഞ്ഞത്. എന്നാൽ ഈ സത്യം ജനങ്ങളിലേക്ക് എത്തുന്നത് തടയാൻ വിളറിപൂണ്ട കോൺഗ്രസ് നേതൃത്വം റീടാറിങ് അട്ടിമറിക്കാൻ ശ്രമിക്കുകയാണെന്നും ബിജെപി പറഞ്ഞു.

സമീപകാലത്ത് ടാറിങ് നടത്തിയ പന്തക്കൽ–നാഗത്താൻ കോട്ട റോഡ് അശാസ്ത്രീയ നിർമാണവും കള്ളപ്പണിയും മൂലം വീണ്ടും റീടാറിങ് ചെയ്യേണ്ടിവന്നത് കോൺഗ്രസിന്റെ വികസനവിരുദ്ധതയുടെ ജീവിച്ചിരിക്കുന്ന ഉദാഹരണമാണെന്ന് ബിജെപി വിമർശിച്ചു. റീടാറിങ് നടത്തിയിട്ടും അതിലും മോശമായ നിലവാരത്തിലുള്ള പ്രവൃത്തിയാണ് നടന്നത്. തുടർന്ന് പ്രദേശവാസികൾ റോഡ് പണി തടയുകയും, ബിജെപി മാഹി മണ്ഡലം കമ്മിറ്റിയുടെ നേതൃത്വത്തിൽ ശക്തമായ ജനകീയ പ്രതിഷേധം ഉയർത്തുകയുമായിരുന്നു.

പന്തക്കൽ ജംഗ്ഷനിൽ നടന്ന ഉപരോധത്തിൽ ബിജെപി മാഹി മണ്ഡലം പ്രസിഡന്റ്  പ്രബീഷ് കുമാർ, മാഹിയിലെ റോഡുകൾ കോൺഗ്രസ് അഴിമതിയുടെ ഇരയാകുകയാണെന്നും, എംഎൽഎയുടെ ഗുരുതര വീഴ്ചകളും ജനവിരുദ്ധ നിലപാടുകളും തുറന്നുകാട്ടി ശക്തമായി പ്രതിഷേധിച്ചു.

പ്രതിഷേധ പരിപാടിയിൽ പോണ്ടിച്ചേരി സ്റ്റേറ്റ് എക്സിക്യൂട്ടീവ് അംഗം അംഗവളപ്പിൽ ദിനേശൻ, മഗിനേഷ് മഠത്തിൽ, ലദീപ് ഇടയിൽപീടിക, ഷാജിമ ചെമ്പ്ര, രജിത ചെമ്പ്ര, ഷനില പള്ളൂർ, വി.കെ. രാംദാസ്, ദിനേശൻ പന്തക്കൽ, മിഥുൻ കൊറോൾ, രാജേഷ് കെ.പി., സുധാകരൻ പന്തക്കൽ, കാവിൽ രാജൻ, ബിജിൻ പന്തക്കൽ, മഹേഷ് കാട്ടുകുന്നത്ത് എന്നിവർ പങ്കെടുത്തു.

ബിജെപി മാഹി മണ്ഡലം കമ്മിറ്റിയുടെ ശക്തമായ റോഡ് ഉപരോധത്തെത്തുടർന്ന് പി.ഡബ്ല്യു.ഡി. എക്സിക്യൂട്ടീവ് എഞ്ചിനീയർ (EE) ബിജെപി നേതാക്കളുമായി നടത്തിയ ചർച്ചയിൽ, നിലവിലെ കരാറുകാരനെ മാറ്റി പുതിയ കരാറുകാരനെ നിയോഗിച്ച് ശാസ്ത്രീയമായ രീതിയിൽ റോഡ് നിർമാണം നടത്താമെന്ന് ഉറപ്പ് നൽകിയതിനെത്തുടർന്നാണ് ഉപരോധം അവസാനിപ്പിച്ചത്.

കരാറുകാരനെ മാറ്റുന്നതിലൂടെ നിലവാരമില്ലാത്ത നിർമാണ പ്രവൃത്തികൾക്ക് അറുതിവരുത്തുകയും, ഗുണനിലവാര മാനദണ്ഡങ്ങൾ കർശനമായി പാലിച്ച് റോഡ് പണികൾ നടത്തുമെന്നും പി.ഡബ്ല്യു.ഡി. ഇ.ഇ. ഉറപ്പ് നൽകിയതായി ബിജെപി അറിയിച്ചു. കൂടാതെ റോഡ് നിർമാണ പ്രവർത്തനങ്ങൾ പൂർണ്ണമായി പൂർത്തിയാകുന്നതുവരെ കർശന മേൽനോട്ടം ഉറപ്പാക്കുമെന്നും അറിയിച്ചു.

റോഡ് നിർമാണങ്ങളിൽ ഗുണനിലവാരം ഉറപ്പാക്കുകയും അഴിമതിയിൽ പങ്കാളികളായ ഉദ്യോഗസ്ഥർക്കും കോൺട്രാക്ടർമാർക്കും എതിരെ കർശന നടപടി സ്വീകരിക്കുകയും ചെയ്യുന്നതുവരെ പ്രതിഷേധങ്ങൾ കൂടുതൽ ശക്തമാക്കുമെന്ന് ബിജെപി മാഹി മണ്ഡലം കമ്മിറ്റി മുന്നറിയിപ്പ് നൽകി.